Matrayumpo an pagkundusir kan Angat Bayanihan Run-Naga, kun saen 3,000 na runner an nagpartisipar bilang pagpahiling nin pagkasararo asin pagtarabangan kan mga Pilipino para sa iba.
Obheto kan nasabing inisyatiba na makatipon nin pondo para sa mga proyekto na makakatabang sa mga lokal na komunidad sa Naga.
Sa intrevista kan Bombo Radyo Naga ki Mark Anthony Relos, saro sa mga nagpartisipar, sinabi kaini na apwera sa pagtulod kan healthy living, an pagkakataon na matabangan an mga benipisyaryo kan Angat Buhay an saiyang mayor na motibasyon.
Importante suboot na mahiling kan mga partisipantes an malinaw asin konkretong paggamit kan saindang kontribusyon ngani na magkaigwa sinda nin kumpiyansa asin padagos na magsuporta sa programa.
Mientras tanto, nag-atendir man si Naga City Myor Leni Robredo sa nasabing aktibidad. Segun ki Raffy Magno, Executive Director kan Angat Buhay, uminabot sa ₱1 million an total na pondo na natipon gikan sa nasabing inisyatiba.
An natipon na pondo nakatalaan na itagama sa mga piling development projects sa Ciudad nin Naga tangarig na makatabang sa pagsimbag sa pangangaipo kan mga lokal na komunidad.
Pig-anunsyo man na an sunod na parte kan Angat Bayanihan Run nakatalaan na isagibo sa manlaen-laen na parte kan nasyon ngonian na taon, kabale na an Davao asin General Santos City.
Mientras tanto, nakatalagang isagibo an mas dakulang “Angat Bayanihan” Run sa Metro Manila sa masunod na taon bilang parte kan pagpahiwas kan programa asin pag-abot sa mas dakul na komunidad.
