NAGA CITY– Kinondenar ni Bayan Muna Partylist Rep. Carlos Isagani Zarate an Citizen’s Crime Watch (CCW) huli sa sinunad kaining P1 milyones na reward sa makakatugdo sa eksaktong lokasyon ninda dating Bayan Muna Rep. Satur Ocampo asin Teodoro Casiño, dating Gabriela Rep. Liza Maza asin dating Agrarian Reform secretary asin si dating Anakpawis Rep. Rafael Mariano na nahahampang sa kasong murder.
Sa entevista kan Bombo Radyo Naga ki Zarate, sinaysay kaini na huli sa lakdang kan CCW sa pangengenotan ni Atty. Ferdinand Topacio, pigkaag kaini sa peligro an buhay kan apat na dating mga lehislador.
Katakod kaini, siniyerto ni Zarate na aatubangon ni Topacio asin kan grupo kaini kun igwa nin maraot na mangyayari sa nasambitan ng mga dating opisyales kan gobyerno.
Mientrastanto, sinaysay kan kongresista na sarong ‘cheap political stunt’ sana an ginibo ni Topacio tanganing makua an atensyon kan Duterte administration.
Marurumdoman na nagpaluwas nin warrant of arrest an Palayan, Nueva Ecija Regional Trial Court kontra sa apat na mga dating kongresista huli sa hinahampang kan mga ini na kasong murder huli sa pangagadan suboot sa nagkapirang miyembro kan grupong Akbayan partikularmente na sa sarong Jimmy Peralta.
