NAGA CITY – Pigtagamahan kan National Irrigation Administration-Bicol nin nasa P1.5-B na pondo an pagpapatindog nin mga solar pump irrigation sa mga omahan na mayong irigasyon sa enterong Bicol Region.
Sa nagin paghampang sa mga kagawad kan media ni Engr. Gaudencio De Vera, Regional Director kan NIA-Bicol, sinaysay kaini na nasa 94-K na ektarya pa kan mga omahan an mayong irigasyon sa Bikol.
Alagad, gikan sa nasambitan ng numero pigpili ninda an mga lugar kun sain sulamenteng an tubig uran sana an saindang pinagkukuanan nin tubig para sa saindang mga tanuman.
Marurumduman, kadakol na mga paraoma an napiritan na mag-untok sa pagtatanom kan kasagsagan kan panlalamasa kan El Niño phenomenon huli sa kawaran nin mapagkukuanan nin bastanteng supply kan tubig.
Huli digdi, piglapigotan kan ahensya na matawan nin tabang an mga paraoma na makapagtanom dawa na panahon kan tag-init sa paagi kan solar water pump.
Dugang pa ni De Vera, dae man kaipuhan na sulamenteng paroy an itanom sa mga omahan pupwede man soboot an mais asin mga gulayon na dae kaipuhan nin kadakol na supply kan tubig.
Piglalaoman man kan ahensya na sa masunod na taon magpapadagos pa an saindang mga programa tanganing makatabang sa mas kadakol pang mga paraoma.
