Propwesto ngunyan ni Senador Risa Hontiveros an pagtatao nin P1,500 bulanang social pension sa gabos nin senior citizen tangani makatabang sa pang uru-aldaw na pangangaipuhan. Ini man an kasunod kan primerong pagdangog kan Senate Committee on Social Justice and Rural Development kan nakalihis na Miyerkules, Agosto 20 para sa Senate Bill No. 215, o Lingap Para Kay Lolo at Lola Act.
Si Hontiveros an may-akda kan nasambitan Ng propwesto na obhetong amyendaran an pirang probisyon nin Expanded Senior Citizens Act o Republic Act No. 9994. Sigun ki Hontiveros, an gabos na mga pangangaipuhan kan mga senior citizen an orog man na nagdudugang mantang naghahaloy orog na an pag abot sa saindang kamugtakan nin salud.
Alagad kadaklan soboot sa mga ini dae na man makayang makabakal nin mga bulong na kaipo. Kaya man napipiritan na mas ipa-urog an pag bayad nin pagkakan, tubig asin kuryente imbes na pagbakal nin mga bulong.
Sa pighurot nin pangangaipuhan para sa universal social pension, tinukoy ni Hontiveros an datos gikan sa Philippine Statistics Authority na nagpapahiling na igwang nasa 11 milyong senior citizen sa nasyon asin kadaklan sa mga ini, igwa nin mga helang na nangangaipuhan nin maintenance medicines.
Dugang pa kan Senadora, kada kumplianyo kan mga senior, pirme soboot pigbabati nin halawig pang buhay asin marahay na salud, alagad pano man masusumpayan an mga buhay kaini kun mayo sindang kakayahan na mabakal an gabos na mga pigkakaipo.
An pag ataman sa mga bulnerable kabali na an mga elderly, sarong constitutional mandate. Sa irarom kan Social Pension for Indigent Senior Citizens Program kan Department of Social Welfare and Development, an presenteng social pension sa mga senior citizen an nasa P1,000 kada bulan asin limitado sana sa mga indigent.
An tabang an primerong itinakda sa P500 alagad piglangkaw sa P1,000 kan nakalihis na Enero 2024 kasunod kan pagsumiter kan Republic Act No. 1196, o “An Act Increasing the Social Pension of Senior Citizens,” kan nakalihis na bulan nin Hulyo 2022.
