NAGA CITY- Mababakal na kan kadakol na sektor an P20 kada kilo kan bagas.
Sa entrevista kan Bombo Radyo Naga ki Marbin Malabanan, Acting Branch Manager kan NFA-Camarines Sur, sinaysay kaini na an nasambitan ng bagas an ibubugtak sa manlaen-laen na partner outlet na magigin dalan tanganing mas mahewas pa an maabot kan programa.
Sigun pa ki Malabanan, pig-enot sana an mga vulnerable sector siring kan senior citizen, bados, PWD nin huli ta sinda an mas nangangaipuhan kaini. Alagad sa ngunyan, bukas na ini para sa gabos na tawo bako sana sa probinsiya kan Camarines Sur kundi magin sa bilog na nasyon.
Paliwang pa kan opisyal, an Food Terminal Inc. an nagfa-facilitate kan distribusyon kan baratong bagas sa paagi kan KADIWA ng Pangulo outlets.
An FTI an mabakal or ma-authorize sa pagbakal nin bagas sa National Food Authority (NFA) tanganing maipabakal man sa mga tawo.
Sa ngunyan, pigsierto na sana ni Malabanan na igwa sindang bastanteng suplay kan bagas na magagamit sa nasambitan ng programa.
