Pig-anunsyar ni Department of Agriculture (DA) Sec Francisco Tiu Laurel Jr. na ibabali na man an mga tsuper kan jeep asin tricycle sa programang P20 kada kilo kan bagas puon Setyembre 16.
Ipapautob ini sa limang pilot areas, kaibahan an mga siyudad kan Navotas kun saen igwang labi 4,000 na rehistradong drayber.
Nakikipag-koordinar na an DA sa Department of Transportation para sa paggamit kan database kan mga lehitimong drayber kan pampublikong transportasyon.
Enot na man na piglunsar an programa para sa mga solo parent, senir citizen, 4Ps beneficiaries, asin persons with disabilities. Pinahewas ini
kalaunan tanganing maiiba na an mga minimum wage earners, paraoma kan paroy, asin mga parasira.
Kaibahan na man sa makikinabang an mga benepisyaryo kan Walang Gutom program kan DSWD asin mga low-income employees kan Department of Education.
Pwedeng makabakal nin hasta 10 kilo kan bagas kada bulan an mga kwalipikadong benepisyaryo, gamit an valid ID o QR code.
Inihayag man kan sekretaryo na ilulunsar an P20 App sa Oktubre 1 tanganing maparekas an distribusyon asin masierto an transparency kan programa. Pigsierto man kan sekretaryo na igwang bastanteng suplay, kasabay kan planong pagpapabakal kan 1.2 milyong sako kan bagas kan National Food Authority sa masunod na bulan.
