Inihayag kan sarong miembro kan 18 inaapod na “Maleta Boys” na inalok sinda nin P20 milyon hasta P25 milyon karibay kan pag-recant o pagbawi sa saindang mga salaysay na nagdadawit sa sarong grupo nin mga opisyal nin gobyerno, kabali si President Ferdinand Marcos Jr. asin dating House Speaker Martin Romualdez, sa korapsyon na may koneksyon sa mga proyekto sa flood control.
Ginibo ni George Villanon Jr. an pahayag matapos magpirma sa mga recantation affidavit an apat sa saindang mga pag-iriba. Inako kan apat na mayo nin katotohanan an saindang orihinal na joint affidavit alagad dai pinangaranan ni Villanon kun siisay an nag-alok sa sainda kan dakulang kantidad nin kwarta.
Pinahimutikan man kaini na gusto kan iba pa nindang mga pag-iriba na bawion an saindang affidavit. Sigon ki Villanon, nagpapadagos an saindang paninindugan sa katotohanan kan saindang mga salaysay.
Naenot man na pinahimutikan ni Atty. Levito Baligod an akusasyon kan apat na “Maleta Boys” na pinagkakakitaan niya an saindang mga kliyente tanganing maggibo nin joint affidavit.
Matatandaan na kan Pebrero, enot na ipinabisto ni Baligod an 18 dating Marines na kun sain nagserbi suboot bilang mga bagman ni dating Rep. Zaldy Co. Nagdara suboot sinda kan P805 bilyon na kickbacks hale sa mga maanomalyang proyekto sa flood control.
