NAGA CITY – Nag-abot sa haros P3.4M an kantidad kan pigtutubudang shabu an nakumpiskar kan Philippine Drug Enforcement Agency gikan sa apat katao sa tahaw kan anti-illegal drug operation kasubanggi sa Barangay San Juan, Gainza, Camarines Sur.
Sa nakuang impormasyon kan Bombo Radyo Naga gikan sa PDEA-CamSur, napag-araman na pasado alas 8:45 kasubanggi kan magkundusir nin joint operation an PDEA, National Bureau of Investigation (NBI), Philippine Army asin Philippine National Police (PNP) sa nasambitan ng lugar kunsaen nadakop an mga suspek na sinda Joseph Glen Candido, Christopher Pagal, Stevan De Luna asin Diana Hubilla.
Nakumpiskar sa mga suspek an nasa 500 grams kan pigtutubudang shabu, mga drug paraphernalia asin motorsiklo.
Sa ngunian, nagpapadagos pa an imbestigasyon kan mga otoridad mantang nagtitinir na sa kustodiya kan mga otoridad an mga suspek para sa maninigong disposisyon.
