NAGA CITY – Maduong pigtuligsa ni Assistant Minority Leader asin Gabriela Women’s Party-list Rep. Arlene Brosas an pig-aprubarang P35 na umento sa sweldo para sa mga obrero sa National Capital Region na pupuonang ipautob sa July 17.
Para ki Brosas, an kakarampot na wage increase an insulto sa mga obrerong Pinoy asin patunay na hampaslupa an hiling sa sainda kan gobyerno.
Sigun ki Brosas, ipapahiling kaini an uripon na pagtrato kan gobierno sa Filipino workers asin an dae pagtatao nin importansya sa saindang derichos asin pangenot na pangangaipohan.
Kawsa kaini, pigsierto ni Brosas na sasabayan kan mahewasang hiro-protesta an nagraraning State of the Nation Address (SONA) ni Presidente Ferdinand Marcos Jr., tanganing ipangapodan an nakabubuhay na sweldo kasabay kan nagtitinding krisis sa nasyon.
Liwat tinawan-duon ni Brosas an P750 across-the-board wage hike tanganing makaputan an P1,200 na daily Family Living Wage sa tahaw kan halangkaw na presyo kan barakalon asin serbisyo.
