Kasunod kan impresibong trayumpo kan Indiana Pacers kontra sa Oklahoma City Thunder sa Game 6 kan 2025 NBA Finals, siniguro ni NBA star Tyrese Haliburton an liwat na pagpreparar kan koponan para sa Game 7, an huring laban sa best-of-7 series.
Sa entrevista ki Haliburton makalihis an kawat, sinaysay kaining mas mahigot an gigibuhong pag-eensayo para sa huring laban. Gugugulon kan koponan an natatadang duwang aldaw tangani pagtibayon pa an team performance gikan man sa opensa hasta sa gagamitong depensa kontra sa Thunder.
Aminado an Olympic champion na mas magigin dipisil an Game 7 nin huli ta apwera sa ini an sarong winner-take-all game, ikukundusir pa kaya ini sa Oklahoma City kun saen nilalaomang magigin aggresibo an fans.
Kan mahapot man an bagitong star kun ano an magigin taktika sa masunod na laban, tinukoy kaini an marahay na ball movement, akmang depensa, asin pakarhay na rebounding.
Dakula an pagtubod kan kada saro sa kapwa player tangani gibuhon an kanya-kanyang papel sa huring laban, kaya man dakulang bagay na makapagpahingalo paramientras an mga ini asin makagibo nin akmang practice antes man an nakatalaang laban sa Lunes, Hunyo-20. Tinukoy man ni Haliburton komo sarong team effort an impresibong kapangganahan sa Game 6.
Dugang pa kaini, nagibo nindang protehiran an saindang homecourt orog na ta habo nindang magkampeon an Thunder sa Indiana. Nagsimbag man igde an Pacers sa nasambitan ng hamon, bagay na nagkawsa nin impresibong kapangganahan asin tinambakan an kalaban, 108-91.
Marurumdumang antes an Game 6, kwestyunable an status ni Haliburton huli sa saiyang minor injury sa toong tabay.
Siringpaman, dagusan man ining tinawan nin clearance tangani magkawat asin dae naghaloy nakapaggibo nin impresibong 14 points asin man limang assists sa laog nin 23 mins na pagkakawat sa hardcourt.
