(UPDATE) NAGA CITY- Pigklaro ngonyan kan tagapagtaram kan Provincial Prosecutor’s Office na dae pa dagos na abswelto an padi na pigtutukdong suspek sa panggagadan ki Jeraldyn Rapiñan sa ibong kan pagkakabasura kan kasong pigsangat laban digdi.
Sa entrevista kan Bombo Radyo Naga ki Prosecutor Desideria Sarmiento, sinaysay kaini na dawa nabasura an kasong murder, dae pa dagos na abswelto si Rev. Fr. Paul Tirao na pigtutukdong suspek sa paggadan ki Rapiñan asin pigklaro kaini na dae pa pinal an desisyon kan kaso huli ta pwede pang magsunad nin motion for reconsideration an pamilya kan biktima.
Enot kaini, nagdesisyon an korte na ibasura an kasong murder laban ki Tirao huli sa kakulangan suboot nin ebidensya na pigpresentar kan kampo kan pamilya Rapiñan ki Prosecutor Zhella Monserate.
Dae suboot bastante an ebidensya arog kan CCTV Footage na nakuanan an sarong gray na kotse kun saen lunad an duwang lalaki na nag-apon sa lawas ni Rapiñan sa Barangay Del Pilar sa banwaan nin San Fernando, Camarines Sur, alagad, dae suboot klaro an lalawgon kan mga suspek sa video kaya dae masierto kun an padi an imbwelto sa krimen.
Marurumduman na nadukayan an lawas ni Rapiñan sa maduot na parte kan Barangay Del Pilar makalihis na magpaaram na mapasiring sa banwaan nin San Fernando para magkua nin kwarta na gagamiton sa pagpapabunyag kan saiyang aki.
Si Fr. Tirao an direktang pigtutukdo kan pamilya Rapiñan na nasa likod kan krimen urog pa ta karelasyon suboot ini kan biktima asin ama kan aki kaini.
