Padre de pamilya gadan kan saksakon kan 1 lalaki sa CamSur; kwarta kan biktima, nawawara

NAGA CITY- Gadan an sarong padre de pamilya kan saksakon ini kan sarong lalaki sa Pili, Camarines Sur.

Binisto an biktima na si Antonio Benavente, 46-anyos.

Nahiling suboot kan duwang menor de edad na aki kan biktima an suspek na si Armando Sto. Domingo, 52-anyos mantang nagdadalagan parayo sa barangay Tinangis.

Digdi na nahiling kan duwang persona an nakabulagta na lawas kan saindang ama na igwa nin tama nin saksak sa saiyang lawas.

Sa saindang pagrekisa, nawawara man suboot an kwarta kan biktima.

Huli digdi, tulos na naghagad nin tabang sa barangay council an tugang kan biktima para sa marikas na pagkakadakop kan nakadulag na suspetsado.

Sa ngonyan, pigbibilaran na sa saindang residencia an nasambitang biktima.