NAGA CITY- Pigbibilaran na ngonyan an padre de pamilya na binawian nin buhay makalihis na magkakan nin tikong sa banwaan nin Pasacao, Camarines Sur.
Sa entrevista kan Bombo Radyo Naga ki kapitan Brandon Barranda kan Barangay Dalupaon, sinaysay kaini na kinua kan biktimang si Joseph Lebantino, 27-anyos an pig-apon na katoy kan tikong makalihis na purbaran ining bunuon kan saiyang ama na si Rolando Lebantino.
Huli ta nakatudan na suboot an pagkakan kan nasambitang sira, pig-ihaw pa kan joven na Lebantino an katoy kaini antes na pigkakan para sa saiyang pamahawan.
Nagpagirumdom pa suboot si Joseph sa mga aki sa lugar na dae an mga ini pwedeng magkakan nin butete huli ta pigpapangalad ini kan mga otoridad.
Makalihis an nagkapirang minuto, bigla na sanang nakamate nin pangungulog nin tulak, paglangkaw kan temperatura asin nagturuog an lawas kan biktima na tulos man pigdalagan sa ospital alagad pigdeklarar na ining dead on arrival kan mga doktor.
Mientrastanto, padagos man an pagpagirumdom ni Barranda sa mga residente sa saindang Barangay na dae na magkakan nin tikong para dae na mautro pa an kaparehong insidente.
