NAGA CITY- Napuli sa pakamunduan an kuta nang maugmang pagselebrar kan aldaw nin mga puso kan mag-agom makalihis na maghugot sa lago kan karsel an sarong padre de pamilya sa banwaan nin Cabusao, Camarines Sur.
Binisto an biktima na si Reynaldo Alicante.
Sa entrevista kan Bombo Radyo Naga ki SPO2 Joel Benculado kan PNP-Cabusao, sinaysay kaini ni pasado alas-6 nin banggi kan ikarsel ninda si Alicante makalihis na ireklamo kan esposa kaini.
Makalihis an haros duwang oras, nagkariribok na sa laog kan karsel makalihis na madiskobre kan mga preso si Alicante na nakabitay na sa karsel gamit an saiyang sweat shirt.
Tulos man na pigdalagan sa ospital an biktima alagad pigdeklarar na ining dead on arrival kan mga doktor.
Sigon ki Benculado, pauru-utro nang pigrereklamo kan agom kaini na si Analyn si Alicante huli ta pirmi suboot kaining iniiwal an saiyang esposa.
