NAGA CITY- Pinag-aadalan na suboot ngonyan kan Philippine National Police (PNP) an posibilidad na bagong modus kan mga drug syndicates an pag-aapon nin iligal na droga sa mga kadagatan.
Ini katakod kan haros P300 milyon na kantidad nin cocaine na narekober kan mga parasira kan nakaaging mga aldaw sa mga kadagatang sakop kan probinsya nin Quezon asin Camarines Norte.
Sa entrevista kan Bombo Radyo Naga ki PC/Insp. Marcelito Platino, tagapagtaram kan Quezon Police Provincial Office (QPPO), sinaysay kaini na nagpuon na an saindang mararumang imbestigasyon para maaraman kun posibleng bagong modus kan mga sindikato an pag-aapon nin mga iligal na droga sa kadagatan asin pigbubugtakan ini nin tracking device para makua kan saindang mga kasabwat.
Enot kaini, kinumpirmar ni Platino na igwang narekober na tracking device an mga parasira na posibleng nakakabit sa nakuang liquid cocaine harani sa Calaguas Island sa probinsya nin Camarines Norte.
Mientrastanto, pigtuga man ni Platino na posibleng sarong grupo sana an imbwelto sa pag-aapon kan nasambitang mga substance na narerekober sa mga kadagatang sakop kan Camarines Norte asin Quezon.
Marurumduman na kan nakaaging semana, enot nang narekober an maabot sa 28 bricks nin cocaine sa boundary kan Quezon asin Bicol na nasundan pa kan pagkakarekober nin mga parasira sa pigkakarkulong nasa P1.3 million na kantidad man nin cocaine sa parte kan Vinzons, Camarines Norte.
