NAGA CITY – Maikokonsiderar soboot na sarong historya sa Pilipinas an pagkakaarestrar kan International Criminal Court (ICC) ki dating Presidente Rodrigo Duterte.
Sa entrevista kan Bombo Radyo Naga ki Atty. April Aidearlin Carelo, Attorney-at-law sa sarong law office, sinaysay kaini na an pagkakaarestar ki dating Presidente Duterte, an sarong makatwiran nin huli ta isinagibo ini basado sa sarong arrest warrant na pigpaluwas kan ICC, katakod kan mga alegasyon kan mga krimen kontra sa sangkatauhan na igwa nin kinaaraman sa kampanya kaini kontra ilegal na droga, na nagresulta sa pagkagadan kan rinibong indibidwal.
Sa presente soboot dae pa pigsasapubliko kan ICC an mga ebidinsya kontra sa dating presidente siringman, an pagpapaluwas kan arrest warrant an nagpapahiwatig na igwa nin bastanteng kapot na ebidinsya an ICC tanganing ipadagos an kaso kontra digdi.
Katakod kaini, kun nagpuon na an paglilitis sa dating Presidente sa The Hague Netherlands, digdi naman ipepresentar kan ICC an mga kapot nindang ebidinsya.
Mientrastanto, an ICC an igwa ni hurisdiksyon na litison an mga indibidwal na pig-aakusaran kan mga malalang krimen siring na sana crimes against humanity, war crimes.
Kun mahahatolan man nin guilty, ikukulong ini sa sarong nasyon na igwa nin kasundoan sa ICC na mag-ako kan mga pighatulan na indibidwal nin huli ta an ICC an mayong sadiring pasilidad para sa mga preso.
Sa lado man nin dating Presidente Duterte, kaipohan kaining magkaigwa nin legal representation tanganing depensaran an sadiri.
Katakod kaini, an pag-arestrar ki Duterte an maikokonsiderar na historya kan Pilipinas, kun kaya, nagpagirumdom si Carelo sa gabos na maboto ngunyan na papaabuton na eleksyon na botohan kun isay an nararapat nin huli ta nagigin repleka an satuyang pigboboto sa nangyayari sa satuyang nasyon.
