NAGA CITY- Pagpapahiling kan pagigin solido asin pagigin pusog kan mga Kongresista an saindang nagin lakdang sa pagbusol sa impeachment complaint kontra ki VP Sara Duterte.
Sa entrevista kan Bombo Radyo Naga ki Atty. Jerico Angelo Galvez, Election Lawyer, sinaysay kaini na an nasambitan ng pag-impeach kan House of Representative sa Bise Presidente an piglalaoman na kan kadaklan orog na ta kaipuhang manimbag soboot kan Vice Presidente sa saiyang mga nagin aksyon kontra ki Presidente Ferdinand Marcos Jr, First Lady Liza Marcos asin an isyu dapit sa Confidential Fund.
Marurumduman, nagpakol sa 215 an kabilugang numero kan mga Kongresista na nagboto tanganing i-impeach si Duterte.
Alagad sigun ki Galves, medyo nahuri soboot an hiro kan House of Representative orog na ta saindang ipinasa sa Senado an dapit sa lakdang huring session na kan mga ini.
Enot naman na sinaysay ni Senate President Chiz Escudero na pwedeng mag-abot pa sa 20th Congress an impeachment trial kontra ki Vice President Sara Duterte.
Ini nin huli ta halipot an panahon kan 19th Congress na kun saen maski puonan an impeachment trial sa pagbwelta kan sesyon, hasta sa Hunyo 30 na sana ini asin masarado na an 19th Congress.
Sa ngunyan, nasa kamot na soboot kan Senado kun saindang ico-convict si VP Sara nin huli ta nagibo na kan House of Representatives an saindang trabaho.
