Pina-uktaba liwat Commission on Elections (COMELEC) an pag-iimprenta nin mga balota na nakatalaan kuta na magpuon kan nakalihis na aldaw, ini an kasunod kan pagsunad nin withdrawal ni Francis Leo Marcos o si Norman Mangusin sa totong pangaran, kan saiyang kandidatura sa pagka-senador.
Si Marcos an pinakabagong nakakua kan Temporary Restraining Order (TRO) para sa national na lebel kaya man pigkaipuhan na ipauntok paramientras kan komisyon an pag-imprenta kan mga balota para sa nagkapirang pagbabago.
Segun pa ki Marcos, nag-withdraw ini tanganing magtaong dalan sa kandidatura ni Sen. Imee Marcos asin pig inkaminar na suportaran an senadora sa eleksyon.
Dugang pa kaini na dae na man mamawoton na siya an magin rason kan liwat na paggastos kan gobyerno para sa pag-iimprenta liwat kan mga balota kaya man mas pigpili kaining umatras na sana.
Para man sa komisyon, ini an saindang pig-ako. Segun pa ki COMELEC Chairman George Erwin Garcia, liwat na mauuurong an pag-imprenta kan mga balota sa Lunes, Enero 27 tanganing magtaong dalan sa pagpakarhay kan database, serialization asin mga ballot face templates.
Katakod kaini, pig inkaminar ni COMELEC Chairman Garcia an mga kandidato na mga may balak pang mag-withdraw kan saindang mga kandidatura na gibuhon na ining mas amay mantang dae pa nagpupuon an poll body sa pag-imprenta kan mga balota.
Dugang pa ni COMELEC Chairman Garcia na enkaso man na-imprenta ng liwat an mga balota asin may biglang nagwithdraw na aspirante, dae na ninda uutruhon an pag-imprenta, imbes ikokonsiderar na sana na mga stray votes an mga makukuang boto kan kandidatong nag-atras.
Sa pagpupuon sa Lunes, mapadara liwat an komisyon sa Korte Suprema nin surat tanganing ipaaram na mapuon na sinda sa pag-imprenta kan mga balota.
