NAGA CITY- Saro soboot sa mga pigkokonsederar na huma kan mga paratukdo sa Philippine Science High School iyo an pagbabago sa curriculum.
Sa entrevista kan Bombo Radyo Naga ki Maria Aileen Pesino, Curriculum and Instruction Division Chief kan Philippine Science High School Bicol Region Campus, sinaysay kaini na sa pagbabago kan curriculum kinakipuhan man na mag-adust kan mga paratukdo orog na ta manlaen-laen man na estudyante an saindang pigkakaputan kada school year.
Apwera digde, yaon man an pagbabago sa kapalibutan partikular an panahon na naeeksperyensiyahan kun saen kaipuhan na makasabay an paagi kan pagtutukdo na pig-iimplementar.
Dugang pa kan opisyal, yaon man an mental health concern kan mga estudyante na dapat pangatamanan sa presente para sa mas marhay na pagkanood kan mga ini.
Sa ibong na lado, maogma man na pigheras ni Pesino na pag-abot sa mga pasilidad mayo soboot sindang problema huli ta provided man an gabos kan gobierno komo pig-apod na iskolar ng bayan an saindang mga estudyante.
Yaon an gabos na pangangaipuhan kan mga kaakian sa lado man kan pagtutukdo, sa mga learning materials asin sa mga pasilidad.
Alagad karibay man kaini, kaipuhan na makapag-kontribwer nin marhay kan saindang mga estudyante sa pagpapa-uswag kan nasyon sa maabot na panahon.
Sa ngunyan, pigsierto na sana kan opisyal na padagos an saindang paglalapigot tanganing makapag-produce nin globally competitive na mga estudyante sa nasyon.
