Bako sanang sa fast food pweding gibuhon an pagbakal nin produkto o pagbayad nin serbisyo sa paagi kan drive thru kundi maging sa pagbayad nin bill sa CASURE II posible naman ining mangyari.
Sa intrevista kan Bombo Radyo Naga ki Engr. Rinner Bucay, Spokesperson kan CASURECO II, obheto kaining mabawasan an trapiko huli sa pagbayad nin bill sa kuryente kan mga miembros kunsumedores kan cooperatiba asin maging komportable an mga mabayad huli ta dai na mababa pa an mga ini sa saindang mga behikulo.
Saro pa sa obheto kaini na mabawasan an mga posibleng nakakaulang na behikulong nakapark sa bisinidad kan CASURECO II huli ta nawawaran na nin parkingan an mga behikulo kan kooperatiba orog na an boom truck asin iba pa, huli sa mga nakapark na behikulo kan mga consumer.
Makakatabang ini tanganing mas mapadali an transaksyon asin dai na magkunsumo pa nin dakul na oras an mga mabayad nin bill sa kuryente.
Sigon sa opisyal, bukas na an drive thru sa banwaan nin Pili asin pweding ma-i-cater kaini bako sanang an mga Piliños kundi maging si mga maagi sa lugar, pwede man maakomodar digdi.
Mientrastanto, basado man sa assessment kan cooperatiba, naging magayon an flow kan pagbayad asin nagkaigwa nin dakul na koleksyon sa paagi kaini.
Sa ngunian, pinag-aadalan pa kun posibleng mabugtakan kaini sa banwaan nin Calabanga alagad saro sa nanutaran na problema sigon sa saindang pag-inspeksyon, pikiti an lugar asin mayong pweding maparkingan an mga consumer.
Naglalaom an opisyal na sa maabot na panahon, mas madugangan pa ini tanganing matawan nin komportable asin kombinienteng eksperiencia an mga consumer sa pagbayad nin bill sa electricidad.
