Nagluwas na kan saiyang pahayag si dating appropriations panel chair Zaldy Co dapit sa pagbaba kaini sa saiyang pwesto epektibo ngunyan na aldaw, Enero 13.
Sa sarong pahayag sinaysay ni Co na labi ining nagpapasalamat sa mayorya sa kamara sa pag-ako sa saiyang desisyon na magbaba sa pwesto komo chairman kan appropriations panel. Sinaysay ni Co na ginibo kaini an desisyon na makulog sa saiyang puso.
Soboot, an rason kaini an saiyang helang o health issues. Kaipohan man soboot kaining tutukan an saiyang pagpapabulong para sa saiyang salud. Bako man soboot suba-suba an trabaho kan Appropriations committee nin huli ta halangkaw an demand kaini sa trabaho.
Labi man ining nagpapasalamat sa tiwala na ipinagkaloob sa saiya orog na an pagpepreparar para pondo kan gobyerno tanganing matabanagn a satuyang mga namamanwaan. Pigbida ni Co na sa laog kan tolong taon saiyang ipinag-orgulyo an Ayuda sa Kapos ang Kita Program o AKAP na nagin kontrobersiyal.
Ipinag-orgulyo kaini na komo sponsor kan budget kan gobierno kan 2023, 2024 asin 2025 saiyang pigsisierto na naka linya ini sa 8-point agenda ni Presidente Ferdinand Marcos.
Pigsierto man ni Co na an pagkakaigwa nin pondo sa mga legacy initiatives kan gobyerno siring kan pansalud, paharong asin food security partikulamente an legacy hospitals asin contract farming an nagtitinir na highlight kan saiyang serbisyo.
