NAGA CITY- Pigtawan duon kan sarong Barangay Kapitan sa Pili, Camarines Sur na kaipuhan baguhon an paagi sa pagheheras nin ayuda sa publiko.
Sa entrevista kan Bombo Radyo Naga ki Jerry Canave, Barangay Kapitan kan Caroyroyan, Pili, CamSur, sinaysay kaini na kaipuhan magkaigwa nin reporma sa pagtatao nin mga tabang kan gobierno para sa mga namamanwaang Pilipino nin huli ta an iba soboot dae na naghahanap-buhay nin tama asin naglalaom na sana digde.
Sigun pa sa opisyal, kadakol na mga Pilipino an nagteteos sa presente asin imbes na gibuhong motibasyon an mga tabang gikan sa presenteng administrasyon o sa National Government nagreresulta pa ini sa mas paglala kan naeeksperyensiyahan na kapagteosan.
An mga resources kan gobierno kaipuhan na nagagamit sa tama kun kaya kun an sarong tawo an benipisyaryo kan anuman na ayuda gikan digde kaipuhan man na tampadan nin paghihigos na makahawas sa kapagteosan orog na ta bako man panghabambuhay an mga tabang na ini.
Kinaipuhan pa man giraray na makanood an sarong tawo na maglapigot sa buhay tanganing mabawasan an poverty na iyo an naggagadan sa kadakol na mga tawo sa nasyon.
Huli kaini, kaipuhan na repasuhon giraray an pagheheras kan ayuda tanganing bako sanang pansamantala na tabang an maitatao sa publiko kundi panghaluyan na kapakinabangan.
