NAGA CITY- Pigtawan-duon kan alkalde sa banwaan kan Minalabac, Camarines Sur na dae dapat mainggit an ibang tawo na dae nakaresiber nin relief goods.
Sigun ki Christopher Lizardo, Alkalde kan LGU Minalabac, na sa panahon ngunyan, kadakol nin mga tawo an nangangaipo kan siring na tabang alagad dae gabos matatawan, kun kaya sa mga residentes soboot na dae man apektado an dae ma-inggit enkaso dae sinda natawan kan siring na tabang orog na ta nagpapahiling sana ini na dae sinda apektado.
Apwera pa digdi, an siring na relief kaya soboot an pantawid gutom sana sa mga naapektaran.
Pinaglinaw pa kan alkalde na limitado sana an pondo kan gobierno.
Sa ibong kaini, pinag-inkaminar man kan alkalde sa mga paraoma na iparehistro an saindang mga pananom tanganing enkaso madanyaran liwat kan siring na kalamidad an saindang tanuman, an igwa sinda makukua maski papano orog na ta an mga masurunod pang bulan an talagang panahon na naglalaog an mga bagyo.
Dapat man soboot i-amdan an sadiri dapit sa huma na pwedeng kahampangon siring kan helang enkaso pababayaan na bakong malinig an saindang kapalibutan.
