NAGA CITY- Kamawotan man kan alkalde sa siyudad nin Naga an matuninong, solemne asin salbadong selebrasyon kan Peñafrancia Festival.
Sa nagin patara-tara ni Naga City Mayor Nelson Legacion, sinaysay kaini na siring kan kamawotan kan mga pade, na magin solemne asin salbado an selebrasyon kan Peñafrancia Fiesta, siringman kaini an pangadyi asin kamawotan kan alkalde.
Sigun ki Legacion, huli ta magigin historical an selebrasyon ngunyan, mas dakol na peregrino na deboto siring man an iba pang mga indibidwal gikan sa National Government, kan simbahan asin mga bisita na mapasiring sa siyudad tanganing makisumaro sa aktibidad.
Kampante man an boot kan alkalde huli sa mga mahihiling na presensya kan mga uniformed personnels kabali na an mga augmentation forces asin support services. Alagad ipinagtawan-duon man kan alkalde na tanganing maisakatupadan an katuninongan asin kasalbadohan kan selebrasyon, an dapat gabos magtarabangan asin bako sana an mga kapulisan.
Katakod kaini, paramientras muna man ipapagbawal an mga pagtitinda kan mga paratienda sa kalabaan kan Peñafrancia Ave. tanganing mayong makaulang sa pagdagsa kan mga deboto partikulamente na ngunyan na isasagibo an Peñafrancia Traslacion Procession.
Ini man an pigpautob kan mga opisyales kan Barangay sa Barangay Peñafrancia sa nasambitan ng siyudad. Sigun ki Joel Tresvalles, obheto kan kasugoan an tanganing malikayan an posibleng pagbungkaras nin insidente orog na ta unpredictable soboot an mga pag-hiro kan kadakol na tawo.
