NAGA CITY- Nagtaong sentimyento si Bayan Muna Partylist Rep. Carlos Isagani Zarate na an mga taong imbwelto sa kurapsyon asin an mga drug lords an pagamahan kan Citizen’s Crime Watch (CCW) nin P1 milyon na reward money para sa pagkaka-arestar kan mga ini.
An pahayag na ini ni Zarate katakod kan anunsyo ni Atty. Ferdinand Topacio na matao an CCW nin P1 milyon na reward money sa makakatukdo sa lokasyon ninda dating Bayan Muna Rep. Satur Ocampo asin Teodoro Casiño, dating Gabriela Rep. Liza Maza asin dating Agrarian Reform secretary, asin si dating Anakpawis Rep. Rafael Mariano na nahahampang sa kasong murder.
Sa entrevista kan Bombo Radyo Naga sa kongresista, sinaysay kaini na maninigong habulon kan CCW asin magkaigwa nin pigpapagamahan na reward money para sa mga kasabwat kan pigmimirar na si pork barrel queen Janet Lim Napoles sa Priority Development Assistance Fund (PDAF) scam siringman an mga big time drug lords na nakakadulag sa anti-drug war kan Duterte administration.
Enot igdi, sinaysay kan opisyal na sarong ‘cheap political stunt’ sana an ginibo ni Topacio tanganing makua an atensyon kan gobyerno.
Katakod kaini, kinondenar naman ni Zarate an lakdang kan grupo asin siniyerto na maninimbagan an CCW kun may maraot na mangyayari sa kinokonsidera na ‘Makabayan 4’ dahil sa nasambitan ng reward money.
