(UPDATE)NAGA CITY- Inaaram pa ngonyan kan mga militar an pagkakabistuhan kan apat na pigtutubudang miyembro kan rebeldeng New People’s Army (NPA) na nagadan sa nangyaring engkwentro sa San Francisco, Quezon suodma, Marso 7.
Sa entrevista kan Bombo Radyo Naga ki Maj. Virgilio Perez, tagapagtaram kan Southern Luzon Command (SOLCOM), sinaysay kaini na nadukayan na sana kan mga soldados hale sa 2nd Jungle Fighter Company kan 85th Infantry Battalion an nasambitang mga bangkay makalihis an nangyaring engkwentro sa barangay Mabunga sa parehong banwaan.
Sigon ki Perez, resulta an nasambitang bakbakan kan mas pinahigot na operasyon asin paglapag kan mga militar sa rebeldeng grupo na pigtutukdong yaon sa likod kan nangyaring panunulo sa nagkapirang mga construction equipments sa banwaan nin San Francisco.
Marurumduman na apat na mga NPA an binawian nin buhay makalihis an engkwentro sa nasambitang lugar sa pag-ultanan kan tropa nin gobyerno asin poko mas umenos 20 mga rebelde.
Narekober man sa lugar an tolong high powered firearms.
Nangyari an engkwentro pirang minuto makalihis an nagbungkaras na saro pang bakbakan sa banwaan nin Goa, Camarines Sur na parte pa kan mga lugar na sakop kan SOLCOM.
