NAGA CITY- Nagin matuninong an nangyaring pagkomemorar kan Undas 2024 sa siyudad nin Naga puon Nobyembre 1 hasta 2.
Sa entrevista kan Bombo Radyo Naga ki Police Staff Sergeant Roberto Aguillon, Assistant Public Information Officer kan NCPO, sinaysay kaini na sa ibong kan pagdagsa kan mga tawo sa sementeryo, dikit man sana soboot an nairehistrong pasiway na mga indibidwal.
Haros gabos man an nagsunod sa mga panundunan na piglatag apwera sa nagkapira na kun saen pigkumpiskar an mag darang arak asin deadly weapons. Apwera digde, namanehar man an trapiko maski nagin bumper to bumper man an bulos kaini orog na sa may parte kan Balatas, Naga City.
Sigun ki Aguillon, nabanga an volume kan tawo na nagbisita sa sementeryo kun kaya nagin marhay man an bulos kaini sa nasambitan ng area.
Pigsaysay pa kan opisyal, magayon man an koordinasyon kan mga kapulisan sa mga barangay officials nin huli ta nakaibahan ninda ini sa pag-assist sa mga sementeryo.
Sa ngunyan, pigsierto na sana kan opisyal na dagos an saindang mga programa tanganing mamantinir an paz y orden sa siyudad nin Naga.
