Ikinahadit na kan UNAIDS an paglangkaw kan HIV sa nasyon kun saen sa saindang datos nagpakol na sa 543% puon pa kan 2010 an mga tinamaan kan virus sa nasyon pinakamarekas soboot na bagong HIV cases sa Asia-Pacific.
Mantang nagbaba man an kaso sa ibang nasyon sa rehiyon. Labi 139,000 na an nabubuhay na igwang HIV sa nasyon, asin piglalaomang maabot pa ini sa 252,000 antes matapos an 2025, sigun sa Department of Health (DOH).
Sigun ki Health Secretary Teodoro Herbosa, haros 50% kan bagong kaso an gikan sa mga kajovenan na igwang edad na 15-24.
Kadaklan an gikan sa same-sex relationship, unprotected sex, asin mga nabibisto sa dating apps.
Kakulangan sa sex education, kasusupgan, asin relihiyosong stigma an nagkapira sa mga primerong kawsa kan paglangkaw kan kaso.
Kan nakalihis na Hunyo, pigrekomendar kan DOH na ideklarar na an HIV komo sarong national public health emergency tanganing maparekas an kasimbagan kan gobyerno na hasta ngunyan, mayo pang simbag an Palasyo.
Alagad maski igwang mga libreng HIV test asin treatment na pigtatangro an gobyerno asin NGO siring kan LoveYourself, nagtitinir pa man na hababa an testing rate asin mas hababa pa an porsyento kan mga nagreresebir kan bulong.
Kadakol na mga kajovenan man an takot na madiskubre kan saindang pamilya an saindang kondisyon, kaya piglilikayan an pagpapabulong.
Sigun sa mga eksperto, kaipuhan pakusugon an sex education, gibuhong accessible an condoms, asin PrEP, asin halion an stigma sa mga tawong igwang HIV.
Sa ngunyan, naghihingowa an DOH na makipagtabangan sa DepEd para sa peer counseling asin updated teaching material
