An April Fools’ Day tuyong Abril 1 an aldaw kun saen pigluluwas kan kadaklan an saindang pagigin creative tanganing magpangirit o magsuba sa paaging nakakaaliw.
Alagad pano baya ini nagpuon asin saen baya ini nag-ugat?
Mayo pang siertong kasimbagan an mga historian. Alagad sarong teorya an nagsasabing kan nakalihis na enot na panahon, Abril 1 an puon kan bagong taon gamit an Julian calendar na binilog ni Julius Caesar.
Kan ipabisto ni Pope Gregory VIII an Gregorian calendar, naibalyo an bagong taon sa Enero 1.
An mga nadakop o dae nakasabay sa pagbabagong ini an pigkonsiderar na “fools.”
Saro pang teorya an gikan sa libro na “The Canterbury Tales” ni Geoffrey Chaucer kan nakalihis na taong-1392, kun saen binanggit an “March 32.”
Dae malinaw an boot sabohon kaini, kaya pigkonsiderar ini nin pirang suba na nagtao puon sa tradisyon.
Maski papano, an April Fools’ Day an padagos na nagtatao nin kaogmahan asin pagkamalikhain sa enot na parte kan ika-apat na bulan.
Siertuhong salbado asin maogma an mga suba na ini.
Sa kampo man kan mga otoridad, pinaglilikay kan pulisya an gabos huli ta posibleng samantalon kan mga scammer an April Fools Day fever.
Uya digde an mga abiso kan Anti-Cybercrime Group dapit sa mga tamang pag-iingat.
- Dae tulos magtiwala sa mga email, text, o apod na igwang “too good to be true” na tangro o urgent na mensahe. Karaniwang piggagamit ini kan mga scammer tanganing makua an personal na impormasyon.
- Surion an mga link asin attachment antes mag-click. An mga phising email an pwedeng magmukhang lehitimo alagad naglalaog nin mapanlinlang na mga link.
- Mag-ingat sa social media post na igwang sensational o emotional na headlines. Pwedeng ini an clickbait na naglalaog nin malware.
- Dae magtao nin sensitibong impormasyon siring kan password o credit card details sa mga dae bistadong tawo o organisasyon.
