NAGA CITY- Padagos na pigtututukan kan PSO-Naga an pagpakarhay kan mga traffic lights sa siyudad nin Naga.
Sa nagin paghampang sa mga kagawad kan media ni Renne Gumba an Director kan PSO Naga, sinaysay kaini na tanganing mapamarhay an daloy kan trapiko sa mga tinampo siringman mapangatamanan an mga commuter asin byahero magkakanigo sana na tolos magsagibo nin pagpakarhay o replacements kan mga traffic lights sa nagkapirang lugar sa ciudad.
Apwera digde, makakatabang man an mga traffic lights tanganing mapagian an trabaho kan mga traffic enforcers na ara-aldaw nagmamanehar sa dalagan kan mga lunadan sa siyudad.
Marurumduman kan nakalihis na bulan kan magpaluwas nin kasuguan an alkalde kan siyudad nin Naga mapadapit sa pagpailaw nin mga traffic lights, alagad huli sa limitado an resources nagkapirang sites sana an nailawan kaya man sa ngunyan pigtatrabaho naman an natatada.
Mientrastanto, pigheras pa ni Gumba na naka-install na sa ciudad an surveilance system asin kamawotan pa an dugang na kagamitan.
