Dae masusugpo an iligal na kalakalan kan vape products sa paagi kan pagpapababa nin buwis.
Sa pagdangog kan Senate Committee on Ways and Means, pigsuhestyon ni Senador Sherwin Gatchalian na pakusugon an enforcement o pagpapautob nin ley tangani wakasan an iligal na kalakalan kan vape products.
Partikularmente kan binanggit kan senador an pagbilog nin mga bagong mekanismo siring kan pagtatao nin insentibo sa mga enforcement agencies.
Pighurot kaini na sa nakalihis na tulong mga pagdangog, bako an pagpapababa nin buwis sa vapor products an solusyon tangani masawata an illicit trade kan nasambitan ng produkto.
Sa puntong ini, nadismaya si Gatchalian sa haloy na pag-usad kan mga kaso sa nasyon na may koneksyon sa ilegal na kalakalan.
Basado sa datos na ipinahiling sa pagdangog, magpuon 2018 hasta 2025, nakapagsagibo an Bureau of Customs nin 1,296 na pagsamsam.
Sa numero na ini, 64 na kaso sana an naisunad; 14 an nakabinbin sa opisina kan piskal; walo an naisunad sa korte; asin man duwa sana an may desisyon gikan man sa korte.
Mientrastanto, an Bureau of Internal Revenue ay nagsagibo nin 1,636 na pagsamsam magpuon 2023 hasta 2025.
Sa numero man na ini, 194 na kaso an naisampa; 15 an nakabinbin sa opisina kan piskal; 14 an naisumiter sa korte; mantang saro an may desisyon gikan sa korte.
Mientrastanto, sa ngunyan ay mayo pang nakasunad na propwesto an Senado patungkol sa buwis sa vape products nin huli ta naka-recess pa an Kongreso.
