Nanindugan an Chinese Embassy sa Maynila na legal na prerogatibo soboot kan gobyerno kan China na magpataw nin sanctions kontra ki dating Senator Francis Tolentino. Inihayag man kaini na may consequences o kahihinatnan an pangugulog sa interes kan China.
Ginibo kan embahada an pahayag makalihis ipaapod kan Asia-Pacific division kan Department of Foreign Affairs si Chinese Ambassador to the Philippines Huang Xilian tangani ipaabot an maduon na pagprotesta kan lado kan Pilipinas sa pagbabawal kan gobyerno kan China sa dating lehislador na maglaog sa saindang mga teritoryo sa mainland China kabali na sa Hong Kong asin Macau huli soboot sa mga inasal kan dating government official sa mga isyu may koneksyon sa China.
Sa sarong statement, sinaysay kan Chinese embassy na ipinaaram kan Chinese Ambassador sa DFA an desisyon kan gobyerno kan China na patawan nin sanction si dating Sen. Tolentino.
Pigtawan duon kan embahada na sa laog kan halabang panahon, dara kan makasadiring interes, nagkapirang mga pulitiko soboot sa Pilipinas na kontra-China an naghayag nin mga mararaot na tataramon asin naghihiro sa mga isyung may kinaraman sa China na nakakadanyos sa interes kaini asin sa relasyon kan China asin Pilipinas.
Ipinunto pa kan Chinese embassy na maduong nanindugan an gobyerno kan China sa pagdepensa kan saindang pambansang soberaniya, seguridad asin interes sa pag-uswag. Alagad sa lado man ka DFA, pinagirumduman kaini an Chinese envoy na sarong demokratikong nasyon an Pilipinas na nagtataong importansya sa katalingkasan kan pagpapahayag.
Mandato man kan mga Senador asin iba pang mga nahalal na opisyal na makiaram sa mga urulay sa national asin public interests.
Sinabi pa kan DFA na ini an nakatuon sa pagsimbag sa mga pagkakaiba sa paagi kan diplomasya asin diyalogo mantang nakikipagkoordinar sa China sa sarong konstruktibong paagi tangani ibusol an pagkakaintindihan sa lambang saro.
