Nawasak an 15-palapag na Mushtaha Tower sa Gaza City makalihis ining bombahon kan puwersang Israeli kan nakalihis na Setyembre 5, na nagresulta sa pagkaraot kan istaran kan ginatos na pamilya, kabali na an sarong Palestinian bank employee na sampulong taon na nagbayad nin mortgage para sa saiyang unit.
Sigun sa Israeli military, an demolition an parte kan kampanyang nagraraot sa mga establisyemnto na soboot ginigibong taguan kan Hamas, kun saen labi sa 50 “terrorist towers” na an winasak.
Alagad sigun sa mga residente asin United Nations (UN) Human Rights Office, mayo soboot na matibay na ebidensyang nagpapahiling may presensya kan grupong Hamas sa mga nasambitan ng establisyemento.
Mahihiling sa video kan Reuters an pagbagsak kan establisyemnto sa laog sana kan anom na segundo, na nagkawsa nin panic asin takot sa mga tawong nakapalibot digde.
Sigun sa U.N., garu pigtutuyo na sana soboot kan Israel an pagpapalayas kan mga Palestino sa Gaza City na kinokonsiderar kan grupo komo ”ethnic cleansing.” Maduong pinahimutikan man kan Israel an nasambigtan ng alegasyong ini asin man pighurot na obheto sana ninda na buwagon an Hamas asin man ibalik an mga hostages.
Marurumdumang magpuon Oktubre 2023, labi sa 65,000 Palestinians na an nairehistro na binawian nin buhay, asin padagos an mahewasang pag ebakwar asin man gutom na naeksperyensyahan sa Gaza huli sa sigalot.
