Nilamon kan darakulang pitak kan gapo asin yelo gikan sa Birch Glacier an Blatten, sarong village sa Lötschental Valley, Switzerland makalihis na magrasay an sarong parte kan bundok sa lugar.
Sigun sa mga awtoridad, 90% kan village ay nawasak kasabay pa kaini an pagbara kan sapa na nagkawsa nin peligro nin pagbaha huli sa natipong tubig.
Enot nang sinaysay kan mga awtoridad na 300 sa mga residente an sainda nang naibakwar kasabay an mga atamang hayop makalihis manutaran an marikas na paghiro kan glacier.
Basado sa report sarong 64-anyos na lalaki an nawawara, asin man presenteng nagsasagibo an mga awtoridad nin search and rescue operations gamit an drone na may thermal camera.
Mientrastanto naka-alert na an military forces kan Switzerland tangani magtabang sa mga posibleng operasyon nin paglilinig asin man pagsalbar kan buhay sa lugar.
Sa sarong press conference, sinaysay ni Swiss Environment Minister Albert Rösti na an insidente an sarong bakong pangkaraniwang kaganapan asin nag promisang tatabangan kan gobyerno an mga residenteng nawaran nin istaran.
Nahahadit man an Swiss glaciologists dapit sa epekto kan global warming na sigun sa mga ini padagos na nagririkas an pagtunaw kan mga glacier kun saen 4% kan glacier volume an nababawas sa nasyon kan nakalihis na taong 2023, makalihis an 6% na pagbaba kaini kan nakalihis man na taong 2022.
