NAGA CITY– Mas magigin simple sana suboot an pagrumdom kan ika-anom na death anniversary ni dating Interior Sec. Jesse Robredo ngunyang taon.
Ini an pahayag ni Bise Presidente Leni Robredo sa paghampang kaini sa mga miyembro kan media sa Naga City.
Sigun ki Robredo, simple sana an ginibo nindang preparasyon kun saen mabisita sana sinda sa Eternal Gardens kun saen nakalubong an dating opisyal asin susundan ini nin misa sa Jesse M. Robredo Museum.
Apwera igdi, magkakaigwa man suboot nin simpleng programa sa nasambitan ng musuem na sasabayan nin launching kan Biography na ginibo kan sarong indibidwal para ki Jesse.
Katakod kaini, piglalaoman kan Bise Presidente na maatendir sa nasambitan ng aldaw an bilog kaining pamilya asin mga katood kan pamilya Robredo.
Marurumdoman na Agosto 18, 2012 kan nagadan an dating sekretaryo makalihis magbagsak an piglulunadan kaining eroplano sa kadagatan na sakop kan syudad nin Masbate.
