NAGA CITY- Pigtawan duon kan representante kan National Historical Commission of the Philippines na an pagselebrar kan ika 128th Death Anniversary ni Dr. Jose Rizal an pagtataong pugay sa kabayanihan kaini asin mga nagirinibuhan para sa nasyon.
Sa nagin patara-tara ni Joan Peconcillo, kan National Historical Commission of the Philippines, sinaysay kaini na an Rizal day an pagtatao nin importansiya kan bilog na nasyon sa nasambitan ng heroe orog na ngunyan na nasa makabagong panahon na an Pilipinas.
Sigun pa sa opisyal, dapat na dae malingawan kan mga Pilipino orog na an mga jovenes sa presenteng henerasyon kun siisay asin ano an naiambag ni Rizal para sa katalingkasan kan nasyon.
Dugang pa ni Peconcillo, kasabay kan pagbabago kan kapalibutan an historya kan Pilipinas asin an mga tawo na pigkokonsederar na heroe siring ni Dr. Jose Rizal an dapat na magtinir na bistado kan haros gabos na mga Pilipino asin naisasalin sa mga jovenes komo pagrespeto sa saindang mga nagirinibuhan.
Dae pwedeng pabayaan na malingawan orog na kan presenteng henerasyon an mga Pilipino na nag-alay kan saindang buhay sa manlaen-laen na paagi para sa karahayan kan bilog na Pilipinas.
