NAGA CITY – Nagbibilog na an gobierno nin mga bagong paagi tanganing masimbagan an kakulangan kan mga nurse sa nasyon. Ini an sa ibong pa kan promosyon sa mga nurse sa ibang nasyon o pagsuporta sa ibang mga nasyon na nagmamawot na mag-hire nin mga nurse gikan sa Pilipinas.
Sigun ki Private Sector Advisory Council-Healthcare Sector Group Lead Paolo Borromeo, naenot nang nagpaapod nin pagtitipon si PBBM tanganing masimbagan an kakulangan kan mga nurse asin nagpag-ulayan an pagpapahewas pa sa Clinical Care Associates (CCA) program.
An nasambitan ng programa an pigdisenyo tanganing matabangan an mga nursing graduates na maipasar an saindang mga licensure exam. Kaipohan soboot matabangan an mga ini na magkaigwa kan saindang lisensya tanganing tulos na makahanap nin marhay na trabaho o makalaog sa mga ospital kan gobyerno asin iba pang government health facilities.
Sigun ki Borromeo, ribo-ribong mga nurse an matatabangan kan nasambitan ng programa, asin posibleng makasimbag sa presenteng hababang numero kan mga nurse sa Pilipinas asin sa ibayong dagat.
Tanganing masuportaran an mga nurse na mawot man na magtrabaho sa ibayong dagat, presente naman soboot an negosasyon kan Department of Foreign Affairs (DFA) asin Department of Migrant Workers (DMW) sa iba pang mga nasyon na nagmamawot na i-subsidize an pag-aadal kan mga Filipino nursing students kun saen pupwede na man sindang ma-employ sa mga nasambitan ng nasyon pagkatapos kan pag-aadal.
