NAGA CITY- Kasabay suboot kan magigin implementasyon kan Bangsamoro Basic Law (BBL) an inaapod na ‘decommissioning’ o an pagsuko na kan armas asin iba pang gamit panggiyera kan mga miyembros kan Moro National Liberation Front (MNLF) asin Moro Islamic Liberation Front (MILF).
Sa entrevista kan Bombo Radyo Naga ki Sen. Sherwin Gatchalian, sinaysay kaini na kun madadagos na an implementasyon kan BBL asin tulos na matatapos an gigibuhong plebisito sa Muslim-Mindanao area, masunod na suboot digdi an pagsuko kan mga soldados kan duwang grupo kan saindang mga armas sa gobyerno.
Kabale suboot ini sa mga importanteng probisyon kan nasambitang propwestong ley asin dapat man na makipagkoordinar na sa gobyerno an MNLF asin MILF sa oras na maipasar na komo ley an BBL.
Mientrastanto, nagtutubod man si Gatchalian na dakula an maidadarang epekto kan BBL sa Marawi City siring man sa iba pang parte kan Muslim-Mindanao area para masimbagan an agrangay kan mga namamanwaan na dae sinda natatawan nin bastanteng pondo kan national government.
Napag-araman na tatawan nin P70 bilyon na ‘block grant’ kada taon kan gobyerno an Autonomous Region of Bangsamoro (ARB) na gagamiton man kaini para sa manlaen laeng mga programa para mas mapakarhay pa an buhay kan mga tao sa Mindanao.
