Pigpropwesto ni Senate President Pro Tempore Jinggoy Estrada an pagtanggal kan mandatory Senior High School (SHS) level sa K to 12 program.
Ini an tanganing gibuhon na mas makabuluhan an sistema na basic education sa nasyon.
Sa saiyang pigsunad na Senate Bill No. 3001, sinaysay ni Estrada an pag-amin kan mga opisyal kan Department of Education (DepEd) na dae pa naaabot kan SHS program an obheto kaini para sa mga K to 12 graduates huli sa kadakol na curriculum, over-worked an mga paratukdo asin estudyante, hababang employment rate kan mga nagtapos kan SHS — 10% sana an naglaog sa labor force, kadaklan pa an sa informal sector.
Apwera digdi, nahiling man soboot an padagos na pagbaba kan kumpiyansa kan publiko sa SHS program — gikan 41% kan 2023, nagbaba sa 35% kan 2024, asin orog pang bagbagsak sa 33% ngunyan na 2025.
Sa propwestong paghali kan SHS level, sinaysay ni Estrada na matinir an mga pangenot na prinsipyo kan RA 10533.
Obheto soboot kan saiyang propwestong amyenda na gibuhong mas simple asin mas marhay an sistema kan high school mantang pigsisierto pa man an kalidad kan edukasyon na akma sa pangkinaban na pamantayan.
Sa irarom kan rationalized basic education program, pigsuhestyon ni Estrada an sarong taong edukasyon sa kindergarten, anom na taon sa elementarya asin apat na taon sa secondary education.
