NAGA CITY- Mahahaluyan soboot pa an pagtatao kan refund na dapat na ibalik kan Casureco 2 para sa saindang member consumer.
Sa entrevista kan Bombo Radyo Naga ki Rinner Bucay, tagapagtaram kan Casureco 2, sinaysay kaini na kan nakalihis na bulan, nag follow up soboot sinda sa ERC alagad hasta sa ngunyan an mayo pang order gikan sa nasambitan ng ahensiya dapit sa generation charge na maire-refund kan mga konsumedores.
Sigun ki Bucay, pigre-review pa soboot kan ERC an kontrata kan kompanya tanganing maaraman kun may sobra o mayo.
Dugang pa kan opisyal, kun iaagi sa legal na proseso, mahahaluyan pa an paghahalat kan nasambitan ng refund.
Kaipuhan soboot kaya an pagbusisi nin marhay tanganing mas malinig an proseso.
Sa ngunyan, hagad na sana liwat ni Bucay an pag-intindi kan gabos tanganing malikayan an anuman na kariribukan o dae pagkaka-intidihan.
