NAGA CITY- Pigtawan-duon kan kapitan kan Barangay Concepcion Grande, Naga City dapit sa importansya kan pagtatao nin impormasyon sa mga kajovenan manungod sa pagboto sa maabot na 2025 National and Local Election.
Sa entrevista kan Bombo Radyo Naga ki Jerrold Rito, Kapitan kan nasambitan ng barangay, sinaysay kaini na magkakaigwa sinda nin voters education campaign para sa mga jovenes.
Sigun ki Rito, nakikipagkoordinar na ini sa mga Sangguniang Kabataan nin huli ta sinda an mangengenot digdi.
Katakod kaini, nakapagschedule naman an mga SK sa pag-ikot sa kada zona para sa full force activity na igwa nin kinaaraman sa eleksyon.
Mientrastanto, pigtawan-duon man kan kapitan an importansya kan pagheheras nin impormasyon manunungod sa eleksyon orog na ta an mga kajovenan an igwa nin dakulang porsyento sa pagboto asin sinda man an masunod na lider.
Apwera pa digdi, pigtatawan-duon man kan kapitan na bakong bastanteng basehan na sarong sikat na artista an dapat magdalagan sa eleksyon alagad hilingon man an background kaini, an mga naginibuhan kaini sa komunidad, asin kwalipikasyon kaini.
Sa paghiling man kan kapitan, an lakdang na “an kwarta sa bulsa, an boto sa balota” an sarong paagi tanganing maraya an mga kandidato kan siring na salang gibuhong tuyong mina-eleksyon.
