Pigkumpirmar ni Senate Blue Ribbon Committee Chairperson Panfilo “Ping” Lacson na liwat mapuon an pagdangog sa senado kan mga anomalya sa flood control projects sa Enero 19.
Sigun ki Lacson, mapuon ini ala-1 nin hapon kun saen, pag-uurulayan sa pagdangog an soboot pag-atras kan mga dating opisyal kan Department of Public Works and Highways (DPWH)-Bulacan na sinda Brice Hernandez asin Henry Alcantara sa saindang mga pighayag sa senado.
Dugang pa kan senador, alagad sinaysay kan Department of Justice (DOJ) na mayong pormal na pigsagibong pagbawi si Alcantara sa saiyang mga pigbuyagyag na anomalya sa proyektong pang-imprastraktura kan gobierno sa pigsagibong pagdangog sa senado kan Setyembre 2025, pag-uulayan pa man kun ano an mga pupwedeng magin kapadusahan enkaso bawion kan mga nasambitan na dating opsiyal kan DPWH an saindang mga sinumpaang salaysay sa blue ribbon committee.
Pigtawan-duon man kaini na lilinawon kan senado sa DOJ kun nag sumiter kan saindang counter affidavit an mga dating opsiyal kan DPWH. Kun saen, pigsierto ni Lacson na lalangkawan an magigin kapadusahan enkaso mapatotoohan an pag-atras.
Mientrastanto, pigpaliwanag man ni Lacson na enkaso man na umatras si Alcantra asin Hernandez sa pagigin testigo pupwedeng paman ipagpadagos an pigsagibong imbesitigasyon huli ta igwa pang ibang ebidensya na makakatukdo sa mga sangkot sa flood control projects siring kan money trail, may kinaaraman o konektado sa testimonya kan mga dating opisyal kan DPWH na pupwedeng ikonsederar kan DOJ o Ombudsman para imbestigaran.
Katakod kaini, ipapaapod kan blue ribbon committee sinda dating Department of Education (DepEd) undersecretary Trygve Olaivar, dating DPWH secretary Manuel Bonoan asin iba pang resource person na dae nag-atendir sa mga enot na pagdangog asin papadarahan kan subpoena an mga dae maatendir.
Mantang pig-iisipan man kun iimbetahan sa pagdangog si Batangas 1st District Representative Leandro Leviste katakod kan paglalantad kaini ng nasambitan na “Cabral files”.
