NAGA CITY – MAS orog pa na magigin mahigot an pagbabantay kan mga barangay tanod asin barangay officials kan Barangay Mabolo sa siyudad nin Naga makalihis an nagkapirang insidente kan mga binabawian nin buhay huli sa pagtagbang sa nasambitan ng tulay.
Sa entrevista kan Bombo Radyo Naga ki Noel Constantino an Barangay Kapitan kan nasambitan ng lugar, sinaysay kaini na kan nakalihis na Sabado, igwa na naman soboot mapurbar na magtagbang sa Mabolo Bridge alagad ini an napugulan kan saindang Chief tanod na yaon sa lugar.
An nasambitan ng bados na babaye an padagos na pighahanap tanganing ma-monitor asin malikayan an mga siring na pangyayari.
Sigun pa ki Constantino, dakula an saiyang pasasalamat sa saiyang chief tanod nin huli ta dakula na naman kuta na isyu an mabungkaras dapit sa Mabolo Bridge.
Huli kaini, mas hihigotan pa kan saindang lado an pagbabantay asin gigibuhon naman na sarong ordinansa an pagbabawal sa paglukso sa mga nagkakarigos sa tulay tanganing malikayan an mga makamundong pangyayari.
Sa ngunyan, naglalom na sana si Constantino na mayo namang magpurbar na magtagbang sa Mabolo Bridge tanganing dae mabugtak sa alanganin na sitwasyon.
