NAGA CITY- Pigsierto kan Barangay Kapitan sa Tabuco, Naga City na padagos an saindang pagtatao nin ayuda sa mga naapektaran kan Bagyong Kristine sa saindang lugar.
Sa entrevista kan Bombo Radyo Naga ki Elisa Carmona, Barangay Captain kan Tabuco Naga City, sinaysay kaini na gabos na mga residentes sa saindang lugar an apektado nin huli ta gabos man an inabot nin tubig baha.Huli kaini, kaipuhan soboot an dugang na tabang tanganing mapaabutan an gabos na mga nangangaipuhan sa saindang barangay.
Katakod kaini, kadakol man an nagtao nin ayuda siring kan mga food packs na igwang laog na pagkakan asin inumong tubig na iyo man an labing kaipuhan kan mga tawo. Pigpasalamatan man ni Carmona si Naga City Mayor Nelson Legacion asin si Atty Leni Robredo siringman an mga pribadong sektor sa saindang ipinaabot na tabang.
Sigun pa sa opisyal, igwang tolong evacuation center sa saindang barangay ini an Tabuco Elementray School, Barangay Hall, Holy Cruz na kaipuhang tawan nin asistensiya nin huli ta igwa pa man giraray an nagtitinir digde.
Sa ibang banda, naghagad man nin pasensiya an opisyal nin huli ta igwa soboot dae na-rescue na mga residentes sa kasagsagan kan bagyo nin huli ta takot naman an mga barangay tanod na magragasa sa tubig baha na makusog an sulog.
Sa ngunyan, pigsierto na sana ni Carmona na padagos an saindang pagtao nin suporta sa mga tawo na labing nangangaipuhan makalihis an panlalamasa kan Bagyong Kristine.
