NAGA CITY- Nagpagirumdom an pamayuhan kan Camarines Sur National High School sa mga estudyante na bawal an paggamit nin vape sa laog kan eskwelahan.
Sa entrevista kan Bombo Radyo Naga ki Dr. Sulpicio C. Alferez III, Principal kan Camarines Sur National High School, sinaysay kaini na mayong pagkakataon na tinugutan an pagsigarilyo asin vape sa saindang eskwelahan.
Aware soboot an saindang mga security personnel sa panundon na ini kun kaya enkaso igwang mahiling o bitbit kan mga estudyante sa laog kan eskwelahan dagos ining pigkukumpiskar, pigpoproseso sa Guidance Office asin pigpapaapod an mga magurang.
Dugang pa kan Principal, dae nagkaigwa nin pagtugot an lado kan Department of Education sa paggamit nin sigarilyo asin vape orog na ta makakaraot ini sa salud kan sarong tawo.
Mientrastanto, pig-ako man ni Alferez na igwang nagkapirang kaso an saindang prinoseso makalihis na madakupan nin vape alagad sa ngunyan mayo pa man bago orog na ta mahigot an saindang pagmonitor sa nasabitan ng isyu.
Nagpaapod man nin meeting an CAMHIGH sa mga magurang tanganing hagadon an suporta asin tabang kan mga ini para sa nasambitan ng problema.
Mas marhay soboot na aram kan mga magurang an nangyayari sa saindang mga aki tanganing magiyahan an mga ini nin tama.
Sa ngunyan, pigsierto na sana ni Alferez na padagos an saindang paghihigot para sa kapakanan kan mga kajovenan.
