Dakula an pagtubod ni Department of the Interior and Local Government (DILG) Secretary Benhur Abalos na kayang pugulan an padagos na paglangkaw kan kaso sa panghahabon nin mga motorsiklo sa nasyon.
An nasambitang pahayag, kan makalihis na tintaan an kasunduan kan Philippine National Police (PNP) asin Land Transportation Office (LTO) manungod sa interconnectivity kan saindang Information and Communications Technology (ICT) System.
Sigun ki Secretary Abalos an pakikipagkoordinar kan LTO asin PNP an kinakaipuhan orog pa ngunyan na nag-abot na sa 30,000 kada taon an mga kaso kan panghahabon kan mga motorsiklo sa buong nasyon.
Katakod kaini, kumpiyansa an kalihim na mas mapaparikas na an pag aram kan mga otoridad enkaso habon o dae an sarong motorsiklo, kaya man mas madali naman an mga ini na makakahaman nin magkakanigong lakdang.
Pigsaysay pa ni Secretary Abalos na an saindang pagsanib pwersa, posibleng maberepika asin ma-access kan PNP-Highway Patrol Group o HPG sa ICT system kan LTO an record kan mga motorsiklo na presenteng pig-iimbestigaran o pigbugtak sa alarma.
Hurot pa ni Abalos, matalaan nin pulis gikan sa PNP-HPG sa LTO Command Center tanganing mas maparikas an pag-berepika sa mga pigkakaipo na mga impormasyon.
