NAGA CITY- Pigheras kan Department of Trade and Industry Camarines Sur an mga programa asin aktibidad na ikukundusir ngunyan na taon.
Sa entrevista kan Bombo Radyo Naga ki Jay Percival Ablan, Provincial Director kan DTI-Camarines Sur, sinaysay kaini na ngunyan na taon sunod-sunod na Marketing events an saindang gigibuhon orog na ta ini an pigkokonsederar na life blood kan negosyo.
Kabali sa ikukundusir an Feria De Camarines, Bishop Francisco Gainza Trade Fair, pagbisita sa Utap hob na nagpapabakal nin mga Utap products asin iba pa.
Apwera digde, igwa man papartisiparan na Fair an DTI-Camarines Sur sa Metro Manila partikular an Bagong Pilipinas Trade Fair siringman an International Trade Fair partikular sa nasyon kan Taiwan.
Dugang pa kan opisyal, yaon man an mga training asin seminar na isasagibo kan saindang opisina siring kan paggamit kan AI sa pag-operate nin negosyo tanganing magin sistematic an paggibo nin mga produkto.
Yaon man an mga serye kan isasagibo na product development siring kan packaging asin labelling kan produkto.
Nagtutubod kaya an opisyal na an magayon na labelling an makakadugang sa adbentahe sa merkado.
Masagibo pa nin diskwento Caravan an ahensiya kaibahan an mga lokal na gobierno tanganing maipaabot sa mga consumers an baratong produkto.
Pigtawan duon kan opisyal na an gabos na aktibidad na nasambit igwang sarong obheto na makagenerate nin kita para sa mga Micro, Small, and Medium Enterprises.
Mientrastanto, sa maabot na bulan nin Marso piglalaoman na magigin operational an Packaging Facility na nagkakantedad nin nasa P86-B na makukua sa Pili, Camarines Sur.
Sa ngunyan, kadakol pang mga programa an nakalinyada ngunyan na taong 2026 kaya pigsierto ni Ablan na preparado an saindang ahensiya tanganing magin matrayumpo ini.
