NAGA CITY – Padagos an pagmanehar kan pamayuhan kan Barangay San Felipe sa siyudad nin Naga sa mga butas na Ido sa saindang lugar.
Sa entrevista kan Bombo Radyo Naga ki Alfonso Rodriguez Barangay Kapitan kan Barangay San Felipe, Naga City, sinaysay kaini na dagos an saindang piglalapigot tanganing mamanehar nin tama an dapit sa problema kan saindang barangay sa mga butas na Ido.
Saro na digde an pagkakaigwa nin mga ikipahe na magagamit sa pagdadakop asin liwat na pagpapagirumdom sa mga pet owners na magin responsable sa saindang mga atamang hayop.
Sigun ki Rodriguez, saro sa mga ginagamit nindang paagi sa pagdadakop an pagbadil sa mga ini na kun saen igwang laog na pampaturog sa mga hayop.
Paliwang kan opisyal, dae man literal na binabadil an mga hayop na kun saen magagadan an mga ini igwa soboot ikipahe na ginagamit na para man sa pagdakop sa mga Ido.
Makalihis ini, tinatawan nin bastanteng aldaw an mga pet owners na i-claim an saindang mga ataman alagad kun mayo soboot masusog sa mga ini mayong ibang pagpipilian an saindang pamayuhan kundi magkundusir kan inaapod na mercy killings.
Mientrastanto, saro pa sa mga pigsisimbagan na problema kan pamayuhan iyo an nagkukuriyat na basura kawsa kan mga butas na Ido na kun saen padagos an saindang pagpapakiulay sa publiko na magin pangataman nin marhay an saindang mga hayop tanganing dae magin kulog kan payo kan komunidad.
Patanid pa kan opisyal na enkaso dae kayang atamanon nin marhay an saindang mga atamang hayop mas marhay na itao na sana ini sa iba na kayang magin responsable.
