NAGA CITY- Pigtawan duon kan pamayuhan kan TESDA-Pili sa probinsiya nin CamSur an importansiya kan pag-aadal sa siring na Vocational Course.
Sa entrevista kan Bombo Radyo Naga ki Marjorie Orosco, Public Information Officer, Registrar II kan TESDA Pili, CamSur, sinaysay kaini na kadakol soboot na mga Filipino workers an igwa na nin skills alagad mayong certification.
Digde naglalaog an TESDA kun saen saindang pigsisierto na mapapanuan an gap na ini asin masimbagan an pangangaipuhan kan industriya asin sa lado kan paggawa.
Obheto kan saindang programa an makapagtao asin makapag-produsir nin Filipino workforce na competitive asin igwang sertipikasyon.
Katakod digde, sa mga mawot soboot na maglaog sa TESDA kaipuhan sanang ipreparar an mga dokumentos siring kan birth certificate, high school diploma o kaya man sa mga dae tapos nin High School mag-provide nin kopya kan ALS Certification na katampad kan High School.
Mientrastanto, pig-ako man kan opisyal na dae malilikayan na igwang kahampangon na problema nin huli ta parte ini kan pagtalubo kan programa.
Sigun ki Orosco, pigkokonsederar ninda komo challenges an mga angat na ini asin padagos na pigsasabuhay an mga rules asin regulasyon kan saindang opisina.
Sa ngunyan, sa mga mawot soboot mag-training bukas an Regional Training Center kan Pili, alas 8 hasta alas 5 nin hapon sa banwaan nin Pili, Camarines Sur.
