NAGA CITY– Nakaandam na magsangat nin kaso an kaparyentes kan mag-agom na senior citizen na binawian nin buhay sa tahaw kan nangyaring bakbakan sa pag-ultanan kan mga soldados hale sa 83rd Infantry Battalion, Philippine Army asin pigtutubudang rebeldeng New People’s Army (NPA) sa Barangay Malabog, Caramoan, Camarines Sur.
Sa entrevista kan Bombo Radyo Naga ki Cherry Aragdon, biyenan kan nagadan na sinda Hermenio asin Soledad Aragdon, emosyunal kaining sinaysay na hagad nindang matutukan kan maninigong ahensya an imbestigasyon sa pangyayari para makua an hustisya para sa saindang mga kaparyentes.
Mapapatotoohan suboot kan mismong opisyal asin mga residente sa Barangay Malabog na bakong miyembro kan rebeldeng grupo an mag-agom.
Sigon ki Cherry, sibilyan an mag-agom na nagpasiring sana sa lugar kun saen nangyari an bakbakan para magkua nin batag sa saindang tanuman na dadarahon kuta na sa ciudad nin Naga.
Mientrastanto, suodma, pighatod na sa saindang huring lulubngan an mag-agom na Aragdon.
Sa suway na entrevista ki Col. Paul Regencia, tagapagtaram kan 9th Infantry Division, Philippine Army, sinaysay kaini na dapat na makapagtao nin pusog na ebidensya an pamilya Aragdon para mapatotoohan na bakong mga NPA an nasambitang mga indibidwal.
Sigon sa opisyal, kabale an mag-agom sa mga nakipagbakbakan sa mga militar na nangyari harani sa nadiskobreng temporary encampment kan mga rebelde sa nasambitang Barangay.
Imposible man suboot an sinasabi kan pamilya Aradon na nagpasiring sa saindang tanuman an duwa asin naipit sa bakbakan urog pa ta mayo suboot umahan na harani sa lugar.
Marurumduman na alas-12:40 nin udto kan Setyembre 11 kan makabakbakan kan mga soldados asin poko mas umenos sampulong mga miyembro kan rebeldeng NPA sa Barangay Malabog na nagresulta sa pagkagadan kan duwang mga indibidwal.
